COTOBATO CITY- ARESTADO ang tatlo katao kabilang na ang isang pulis kasabay ng pagkakakumpiska ng halagang P4 milyong shabu na nakalagay sa tea packets sa isinagawang buy-bust operation sa lalawigang ito.
Batay sa report ng pulisya, ang nasakote ay isang aktibong pulis na pansamantalang hindi binanggit ang pangalan at dalawa pang sibilyan na kasama nito.
Nabatid na matagal na umanong sinusubaybayan ng mga awtoridad ang nasabing pulis bago isinagawa ang operasyon nitong Martes.
Bukod sa shabu na tinaguring Tsa-bu ay nakumpiska rin ng mga operatiba ang service firearm ng suspek at buy-bust money na ginamit sa transaksiyon.
Kasalukuyang nasa kustodiya ng Philippine Drug Enforcement Agency (PDEA) ang mga suspek at posibleng maharap sa kasong paglabag sa Comprehensive Dangerous Drugs Act. EVELYN GARCIA
