KINONDENA ni Senadora Imee Marcos ang malaganap na pagsasamantala ng mga negosyante sa hanay ng mga manggagawa sa patuloy na hindi pagbibigay ng kanilang 13th month pay kapag dumarating ang panahon ng Kapaskuhan.
Ibinunyag ng senadora na hanggang ngayon ay maraming negosyante ang hindi sumusunod sa batas at sa halip na ibigay ang kabuuang isang buwang sahod bilang 13th month pay, binibigyan na lamang ang mga regular na manggagawa o empleyado ng grocery items.
“Dapat isang buwan na sahod ang ibinibigay ng mga employer sa kanilang mga empleyado. Pero binabarat talaga nila ang mga manggagawa at grocery items na lang ang kapalit na halos P2,000 lang ang halaga,” ani Marcos.
Sinabi pa niya na hindi lamang sa Metro Manila laganap ang ganitong ginagawa ng mga negosyante kundi pati sa mga probinsiya.
“Ang masakit pa nito, sasabihin ng mga employer sa kanilang mga empleyado na ang grocery items na kanilang nakuha ay Chirstmas bonus na rin. Parang may utang na loob pa ang mga manggagawa ngayon,” sabi pa ni Marcos.
Aniya, walang kapangyarihan ang Department of Labor and Employment (DOLE) na obligahin ang mga kompanya dahil walang kaparusahan na isinasaad sa batas na nagpapataw sa mga negosyanteng hindi sumusunod sa pagbibigay ng13th month pay.
“Kailangan sigurong pag-usapan namin ito ng DOLE para masigurong hindi makalulusot ang mga negosyanteng hindi nagbibigay ng 13th month pay. Kung kinakailangang susugan natin ang batas, gagawin natin ito,” dagdag pa ni Marcos.
Ayon pa kay Marcos, isa ang Trade Union Congress of the Philippines o TUCP na patuloy na lumalaban para sa karapatan ng mga manggagawa at nagsisiwalat ng pagsasamantala ng mga kapitalista. VICKY CERVALES
Comments are closed.