CAVITE- AGAW eksena sa mga tao ang labing limang baka na tila namamasko sa kalsada sa bayan ng Rosario sa lalawigang ito.
Ikinatuwa ng mga bata ang eksenang ito kahapon dakong alas-2:39 ng hapon lalo na’t bibihira ang ganitong pagkakataon.
Sa video ni Chung Dela Cruz Ubas, makikita ang 15 baka na naglalakad na pumukaw ng atensyon ng tao sa kahabaan ng Kalye Marseilla Brgy. Poblacion ng nasabing bayan.
Ayon kay Chung, katatapos lang umano niyang mamili ng oras na iyon sa isang convenience store nang makita niya ang mga baka sa kalsada na nagdulot ng banayad na trapik.
“Sa totoo lang, natuwa at na-excite ako ng makita ko sila. Kasi hindi naman din madalas akong nakakakita ng baka at lalo pa nga’t sa kalsada na tila nagpaparada pa. Ang cute nila, saan sila punta”, kuwento ni Chung.
Samantala, nang makarating ang pangyayari sa Rosario Traffic Management Office sa pamumuno ni Fernan Garcia, agad nilang itinaboy pabalik ang mga baka sa kanilang kural.
Napag-alamang nakawala pala ang mga baka sa kanilang kural kaya napadpad sa kalsada na pagmamay-ari ng isang pribadong indibidwal. SID SAMANIEGO