DALAWANG drug den ang nalansag habang 16 na drug personalities ang natiklo sa magkakahiwalay na buy bust operations noong Martes ng gabi hanggang Miyerkoles ng madaling-araw sa Valenzuela City.
Buena mano sa piitan dakong alas-8 ng gabi noong Martes sina Angelo Pabaya, 30-anyos, ng 87 Sabino Alley, Brgy. Maysan; Maritess Bartolome, 31-anyos; Oscar Ucsan, 37-anyos; Jomar Dominic San Diego, 22-anyos; at Arnel Osico, 29-anyos, nang paiskorin ng shabu ang isang undercover na pulis sa kanto ng Sabino Alley at makuhanan ng apat na sachet ng shabu at P300 marked money.
Nalambat naman sina Jerald Parungao, 32-anyos; at Archie Tolentino, 39-anyos, sa operasyon sa 34 St., Prince, Sam Villa, Brgy. Malinta dakong alas-2:20 noong Miyerkoles ng madaling-araw.
Binitbit din sa presinto sina Fernando Padasas, 44-anyos; Ronell Soriano, 31-anyos; at Louie Prospero, 22-anyos na naaktuhang nagpapasahan ng tooter sa nasabing lugar na lungga umano ng mga adik sa nasabing lugar.
Nakumpiska sa mga dinakip ang anim na sachet ng shabu, P300 marked money at drug paraphernalia.
Bandang alas-2:45 ng madaling-araw nang madakip ng mga parak sina Billy Abad, 39-anyos; at Elmer Martin, 46-anyos, nang bentahan ang isang undercover na pulis kapalit ng P200 marked money sa 3613 Clemente Compound, Brgy. Gen.T. De Leon.
At dahil abala sa pagsinghot ng shabu ay huli na nang mamalayan nina Luis Calisaan, 46-anyos; Dexter Tamaña, 43-anyos; Jackson Palos, 41-anyos; at Mark Lagansua, 42-anyos na may mga parak kaya’t huling-huli silang bumabatak sa bahay ni Martin sa nabanggit na lugar na nagsisilbi rin umanong drug den kaya’t kasama silang isinakay sa mobil at dinala sa himpilan ng pulisya.
Nasamsam kay Abad ang dalawa pang sachet ng shabu at buy bust money habang nasamsam sa bahay ni Martin ang nagkalat na mga bukas na sachet ng shabu at sari-saring drug paraphernalia.
Nahaharap sa paglabag sa Comprehensive Dangerous Drugs Act of 2002 ang mga suspek. VICK TANES
Comments are closed.