(17 bagong kaso nadagdag) DELTA VARIANT SA PINAS, 64 NA

UMAABOT  na ngayon sa kabuuang 64 ang mga kaso ng Delta variant (B.1.617.2) ng COVID-19 sa bansa.

Ito ay matapos na makapagtala pa ng 17 bagong kaso ng naturang mas nakahahawang variant nitong Sabado, batay na rin sa pinakahuling genome sequencing report na inilabas ng Department of Health (DOH), University of the Philippines – Philippine Genome Center (UP-PGC), at ng University of the Philippines – National Institutes of Health (UP-NIH).

Natukoy na sa karagdagang 17 Delta variant cases, 12 ang local cases at isa ang returning overseas Filipino (ROF).
Kinukumpirma pa umano nila kung apat na iba pang kaso ay local cases o ROFs.

Nabatid na sa 12 lokal na kaso naman, siyam ang may address sa National Capital Region (NCR) at tatlo naman sa Calabarzon.

Tatlo umano sa mga ito ang nananatiling aktibong kaso pa o nagpapagaling pa mula sa karamdaman, habang ang 14 naman ay nakarekober na.

“The outcomes are being validated by our regional and local health offices. This brings the total Delta variant cases to 64,” anang DOH.

Samantala, bukod sa karagdagang Delta variants, iniulat din ng DOH na nakapagtala rin sila ng karagdagan pang 11 kaso ng Alpha variants (B.1.1.7) , 13 Beta (B.1.351) variant cases, at dalawang P.3 variant cases sa bansa.

Sa 11 Alpha variant cases, 10 ang lokal na kaso habang biniberipika pa kung lokal o ROF case ang isa pa.

Base sa case line list, isa sa mga ito ang nanatiling aktibo, pito ang nasawi at tatlo ang nakarekober. Nasa 1,679 na rin ang kabuuang kaso ng Alpha variant sa bansa.

Sa 13 bagong Beta variant cases naman, 10 ang lokal na kaso at ang bineberipika kung lokal o ROF.

Base sa case line list, isa sa mga ito ang active case pa rin, dalawa ang nasawi at 10 ang nakarekober. Sa kabuuan, mayroon nang 1,840 Beta variants sa bansa.

Sa dalawang P.3 variants naman, na kapwa nakarekober na, isa ang local case habang hindi pa batid kung local case o ROF ang isa pa.

Kaugnay nito, iniulat ng DOH na ang mga samples mula sa mga seafarers ng M/V Tug Clyde at Barge Claudia ay isinama na sa susunod na batch nang isasagawang whole genome sequencing.

Kasunod naman ng anunsiyo ng pagkakaroon ng local transmission ng Delta variant sa bansa, binigyang-diin ng DOH ang pangangailangan na paigtingin pa ang contact tracing upang kaagad na ma-isolate ang mga pasyenteng dinapuan nito.

Mahigpit ang paalala ng DOH sa mga mamamayan na istriktong tumalima sa ipinaiiral nilang minimum public health standards (MPHS), magpabakuna na laban sa COVID-19 at kumpletuhin ang kanilang doses alinsunod sa schedule nito. Ana Rosario Hernandez