CAVITE – DALAWANG babaeng shoplifters ang nasakote ng security guard makaraang sikwatin ang tatlong mamahaling liquid soap sa SM City Molino Hypermarket sa Bacoor City, noong Miyerkoles ng hapon.
Kinasuhan ang mga suspek na sina Judeth Balite Reyes, 42, ng Brgy. Malanting Amparo, Caloocan City; at Mary Jane Reyes Palomares, 42, ng Barangay Bagong Barrio, Caloocan City.
Sa ulat ni PO2 Mark Francis Cortez na naisumite sa Camp Pantaleon Garcia, lumilitaw na dumayo pa ang mga suspek sa nasabing hypermarket para isagawa ang modus operandi.
Subalit, hindi nakalusot ang modus operandi ng dalawa sa matalas na paningin ng dalawang security guard na sina Emilyn Bungay Tobula at Nico Rido Palomar kaya kaagad na inaresto ang mga suspek.
Ayon pa sa ulat ng pulisya, inabangan ng dalawang sekyu ang mga suspek na magbayad sa cashier subalit nagpatay-mali at lumabas bitbit ang kinulimbat na tatlong liquid soap na nagkakahalaga ng P1,210.50.
Nabatid din na ang mga suspek ay nakakulimbat na sa iba pang supermarket sa karatig bayan subalit sa kanilang pinakahuling modus operandi ay selda ang binagsakan. MHAR BASCO
Comments are closed.