2 BEBOT TIMBOG SA PEKENG TITULO

CAGAYAN-KASONG estafa at falsification of public documents ang kahaharapin ng dalawang babae makaraang bentahan ang isang ihenyero ng pekeng titulo ng lupa na inaresto ng mga kagawad ng National Bureau of Investigation (NBI) sa lungsod ng Tuguegarao ng nasabing lalawigan.

Nakilala ang dalawang suspek na sina Tessie Mangabat, residente ng Barangay Quitnang Bayan uno, San Mateo, Rizal at Rebecca Allayban, residente naman ng Barangay Annafunan East, Tuguegarao City.

Sa nakuhang impormasyon mula kay Atty. Gelacio Bongngat, Regional Director ng National Bureau of Investigataion (NBI)-Region 2, pormal na nagtungo sa kanilang tanggapan ang biktimang si Engr. Ferdinand De Leon, 61-anyos, residente ng Barangay San Gabriel, Tuguegarao City, Cagayan upang ireklamo ang mga suspek dahil sa peke ang ibinentang titulo ng lupa sa kanya.

Nabatid na nagpakilala si Mangabat sa biktima bilang si Minda Planta-Villa at sinabing kapatid siya ng may-ari ng lupang ibinebenta na si Dionisio Planta na agad naman naniwala si De Leon dahil sa mga dokumentong ipinakita tulad ng titulo ng dalawang parcel ng lupa na bibilhin nito na matatagpuan sa Barangay Carig at mayroon din umanong dalawang special power of attorney na nagsasabing pinapahintulutan ang suspek na ibenta ang lupa dahil ang nagmamay-ari nito ay may sakit at kasalukuyang nasa pagamutan.

Dahil dito,agad na nagbigay ang biktima ng P460,000 bilang paunang bayad mula sa kanilang usapan na P800,000.

Subalit,isang concern citizen ang nagsabi sa biktima na peke ang mga dokumento ng lupang nabili niya kaya’t agad itong nakipag-ugnayan sa NBI at bineripika sa mismong may-ari ng lupa.

Ikinasa ang isang entrapment operation ng NBI na nagresulta ng pagkakadakip ng dalawang suspek sa aktong inaabot ang P340,000 para sa kabuuang bayad ng lupa sa Caritan Highway. IRENE GONZALES