MALABON CITY – ARESTADO ang dalawang miyembro ng “Allan Metallica” drug group at gun for hire syndicate na nag-ooperate sa CAMANAVA area sa buy bust operation of firearm ng pulisya kamakalawa ng gabi.
Kinilala ni District Special Operation Unit (DSOU) PCI Angelo Nicolas ang mga naarestong suspek na si Marvin Velasco, 24 ng B-3 Lot 70 Phase 2 area 3 Brgy. Longos at Jonathan Juatan, 28 ng B-4 Lot 5 Tupda Village Brgy. 12, Caloocan City.
Ayon kay PCI Nicolas, alas-11 ng gabi nang ikasa ng mga operatiba ng NPD-DSOU at Malabon City Police sa ilalim ng pamumuno ni Sr. Supt. Jessie Tamayao ang buy bust operation of firearm sa pangunguna ni P/ Insp. Melito Pabon kontra sa mga suspek sa labas ng bahay ni Velasco sa Brgy. Longos matapos ang natanggap na ulat ng pulisya hinggil sa ilegal na pagbebenta ng baril ng mga suspek.
Matapos iabot ng mga suspek ang isang cal. 38 revolver sa isang undercover police na nagpanggap na buyer kapalit ng P500 marked money, agad nagbigay ng signal ang pulis sa kanyang mga kasamahan na nakaantabay sa lugar.
Agad namang sumugod ang mga operatiba saka inaresto ang mga suspek at nang kapkapan ay narekober sa mga ito ang tig-isang plastic sachet na naglalaman ng hinihinalang shabu.
Sinabi ng pulisya, ang mga naarestong suspek ay sangkot din sa pagkalat ng ilegal na droga sa Brgy. Longos. EVELYN GARCIA
Comments are closed.