ARESTADO ang dalawang tulak na nasa talaan bilang No. 6 at nasa watchlist ng mga awtoridad sa lungsod ng Pasig.
Sa ulat na tinanggap ni EPD-Director BGen. Rolando Yebra mula kay Col. Roman Arugay, hepe ng pulisya kinilala ang nadakip na sina Paul Christian Cabrera alyas “Kogkog”, 26-anyos, binata, K12 graduate at nasa watchlist at Chris Steven Villadolid, 20-anyos nasa illegal drug rank No. 6, Mr.Speedy Delivery Rider, kapwa nakatira sa CP Santos St., Brgy.Ugong ng nasabing lungsod.
Nabatid na dakong ala-5:45 kamakalawa ng hapon nang madakip sa buybust operation ng Station Drug Enforcement Unit (SDEU) sa pangunguna ni Lt. Kenny Khamar Khayad ang dalawa sa F. Legaspi St. sa nasabing lugar.
Nakuha sa kanilang pag-iingat ang 16 gramo ng shabu na nagkakahalaga ng P108,800.00, buy bust money at isang Mio Sporty Motorcycle na ginagamit ng mga suspek sa pagtutulak.
Kasong paglabag sa Sec 5 at 11 Art.ll ng RA 9165 ang kakaharapin ng mga ito habang nakapiit sa detention cell ng pulisya . ELMA MORALES