KULUNGAN ang bagsak ng dalawang sabungero matapos mahuli sa aktong pagsusugal sa nagaganap na illegal cock fighting sa Caloocan City nitong Huwebes ng hapon.
Nakilala ang mga naaresto na si Dante Pormocille, 57-anyos, construction worker at Romar Legnes, 34-anyos, ng Amparo Subdivision, Barangay 179.
Sa nakarating na ulat kay Caloocan police chief Col. Samuel Mina Jr., inaresto ang mga suspek bandang ala-5:30 ng hapon nang magsagawa ng Oplan Galugad ang mga tauhan ng Sub-Station 15 sa kahabaan ng Dao St. Amparo Subdivision, Brgy. 179 nang mapansin ng mga ito ang isang gropu na nagsasagawa ng illegal cock fighting.
Subalit, nang mapansin ng mga nagsasabong ang presensiya ng mga pulis ay mabilis na nagpulasan ang mga ito sa magkakaibang direksyon habang nagawang maaresto ang dalawa.
Nakumpiska ng mga pulis sa lugar ang dalawang panabong na manok na may tari at P1,500 bet money. VICK TANES
Comments are closed.