NEGROS OCCIDENTAL -HALOS madurog ang murang katawan ng dalawang taong gulang na batang lalaki nang magulungan ito ng truck sa Sitio Ulalod, Barangay Oringao, Kabankalan City.
Ayon kay Police Staff Sergeant Junrey Escorsuela, traffic investigator ng Kabankalan City Police Station, ang biktima ay kinilalang si Christian Andre Emperado.
Nakapiit naman ang truck driver na si Franklin Amorganda, 32-anyos, na residente ng Barangay Tamisu, Bais City.
Lumalabas sa pagsisiyasat na Lunes ng hapon habang naglalaro ng computer game ang bata sa kanilang kapitbahay sa tabi ng daan ay nakita nito ang kanyang tiyahin kaya patakbo niya itong sinalubong.
Sa imbestigasyon ng mga pulis, lumalabas na papuntang city proper ang truck nang biglang tumawid ang biktima upang salubungin ang tiyahin na nakita nitong bumaba sa jeep galing sa paaralan.
Pinigilan pa siya ng isa pa niyang tiyahin ngunit nakapalag ang paslit at dahil sa bilis ng takbo at bilis ng panyayari atrasado na ang driver ng truck na maiwasan ang bata kaya nahagip ito at nagulungan pa. VERLIN RUIZ
