SA kulungan bumagsak ang dalawang sangkot sa illegal na droga matapos makunan ng shabu at baril sa isinagawang buy bust operation ng pulisya sa Malabon City kamakalawa ng gabi.
Kinilala ni Malabon police deputy chief LtCol Aldrin Thompson ang naarestong mga suspek na si Herby Aquino, 36-anyos at Ricky Operario, 50-anyos, kapwa ng Brgy. Longos.
Ayon kay SSg Salvador Laklaken Jr, dakong alas-7:20 ng gabi nang magsagawa ang mga operatiba ng Station Drug Enforcement Unit (SDEU) sa pangunguna ni SSg Kenneth Geronimo ng buy bust operation sa kahabaan ng Borromeo St. Brgy. Longos, Malabon City.
Isang undercover police na nagpanggap na buyer ng droga ang nagawang makipagtransaksyon sa mga suspek ng P500 halaga ng shabu.
Matapos tanggapin ng mga suspek ang marked money mula sa poseur-buyer kapalit ng shabu ay agad silang dinamba ng mga operatiba.
Nakumpiska sa mga suspek ang tinatayang nasa 4.51 gramo ng shabu na may standard drug price P30,600, buy bust money at isang 357 Magnum Smith & Wesson Revolver na kargado ng 3 bala.
Kasong paglabag sa RA 9165 o Comprehensive Dangerous Drug Act of 2002 at RA 10591 o Comprehensive Firearms and Ammunition Regulation Act ang isinampa ng pulisya kontra sa mga suspek sa Malabon City Prosecutors Office. EVELYN GARCIA
Comments are closed.