BAGUIO CITY – KALABOSO ang dalawang notoryus drug courier makaraang makumpiskahan ng P340K halaga na shabu sa isinagawang anti-drug operation sa bahagi ng Ferguson Road sa nasabing lungsod noong Lunes ng hapon.
Ayon kay PDEA -Baguio City Officer Reinier Tinong, nasamsam ang 50 gramo high-grade shabu sa mga suspek na sina Clint Ambrosio Mecachor, 33-anyos, ng Malate, Manila at Reynaldo Buda de Castro, 33-anyos, ng Balagtas, Bulacan.
Narekober din sa mga suspek ang isang cellphone, 2 motorsiklo na may plakang 010103 at 0101-0826049.
Nabatid din kay Tinong, ang mga suspek ang kumukuha ng droga sa lowlands at dinadala sa Baguio kung saan nakorner ng mga awtoridad makaraang makipag-ugnayan ang lokal na pamahalaan at pulisya sa intelligence agents ng PDEA.
Isinailalim na sa drug test at physical examination ang mga suspek habang pina- chemical analysis naman ang shabu na gagamitin ebidensya sa pagsasampa ng kasong paglabag sa RA 9165 ( Comprehensive Dangerous Drugs Act). MHAR BASCO
Comments are closed.