24K FULLY VACCINATED SENIORS MAY P1K GC

MAHIGIT 24,000 senior citizens sa Makati na nakatanggap ng kumpletong baksinasyon ang napagkalooban na ng P1,000 gift certificates na nangga­ling sa local na pamahalaan.

Ito ang napag-alaman kay Makati City Mayor Abigail “Abby” Binay na nagsabing isa ito sa pamamaraan ng lokal na pamahalaan upang mahikayat ang senior citizens na magpabakuna laban sa COVID-19.

Matatandaan na sinimulan ng lokal na pamahalaan ang distribusyon ng P1,000 gift certificates noong Hulyo 5 kung saan ay umabot na sa 24,352 senior citizens ang nakatanggap na ng kanilang gift certificates.

Ang pagbibigay ng naturang insentibo ay isang paraan ng lungsod upang hindi na magdalawang-isip pa ang isang indibidwal para magpabakuna partikular ang senior citizens na high risk sa panghahawa ng sintomas na idudulot ng COVID-19.

Sinabi ni Binay na nito lamang nakaraang buwan, nagkaroon ng pagtaas ng bilang ng senior citizens na nagparehistro para sa COVID-19 vaccination ng mga nasa A2 category.

Sinabi pa ni Binay na pagdating ng katapusan ng Hulyo ay mayroon ng 50,000 na senior citizens ang nagparehistro kung saan 44,121 ang tumanggap ng unang dose ng bakuna habang 35,813 naman ang mga fully-vaccinated na.

Ang insiyal na pagdating ng isang milyong bakuna na inangkat ng lungsod ay inaasahang dadating sa lungsod ngayong buwan ng Agosto.

Dagdag pa ng alkalde, ang hinihintay na pagda­ting ng nabanggit na bakuna ay makakapagturok ito ng 500,000 Makatizens na kinabibilangan ng mga residente at transient workers.

Upang makamit ang herd immunity ay kinakaila­ngan na magbakuna ng 430,000 indibidwal o katumbas ng 70 porsiyento ng kabuuang populasyon sa lungsod. MARIVIC FERNANDEZ