250 OFWs SA KUWAIT NAKAUWI NA

IGINIIT ni Labor Secretary Silvestre Bello III na may 250 overseas Filipino worker mula sa Kuwait ang nakauwi noong Martes, matapos tugunan ng pamahalaan ang kahilingang agarang tulong ng mga migranteng manggagawa.

Walumpu sa mga OFW ang galing sa Migrant Workers and Other Overseas Filipinos Resource Center (MWOFRC) samantalang ang 170 ay domestic at company worker.

“Ang mga manggagawang ito ay iyong natapos na ang kanilang kontrata o nag-expire na ang kanilang exit visa at mga biktima ng iba’t-ibang paglabag sa kontrata na may kaugnayan sa trabaho,” pahayag niya.

Sinabi ni Bello na nakauwi ang mga migranteng manggagawa sakay ng Qatar Airways chartered flight na inayos ng pamahalaan.

Ang Overseas Workers Welfare Administration (OWWA) ang nagbayad sa tiket ng 50 OFWs habang ang iba ay sinagot naman ng kanilang employer o kompanya.

“Dumating sila ng bansa noong Agosto 31, 4:50 ng hapon. Sinalubong sila sa airport ng mga kinatawan ng pamahalaan,” dagdag pa niya.

Sinabi ng kalihim na tulad ng mga pinauwing OFW ng pamahalaan, ang mga dumating na migranteng manggagawa, sakay ng QR 932, ay tatanggap ng iba pang tulong tulad ng quarantine accommodation at transport service para sa kanilang biyahe pauwi sa kani-kanilang pamilya.

“Bibigyan din sila ng pagsusuri para sa Covid-19 at ang gastusin ay sagot ng pamahalaan, bilang bahagi ng standard operating procedure at pagsunod sa safety and health protocols,” wika niya.

Sinabi ng Philippine Overseas Labor Office (POLO) ng Kuwait na ang chartered flight ay bilang tugon ng DOLE sa kahilingan ng mga OFW na hindi makauwi sa pamamagitan ng regular flight.

“Ito ay dahil sa kasalukuyang paghihigpit at pagpapatupad ng daily seat cap para sa mga dumarating na Filipinong manggagawa sa ating bansa,” pahayag ni Labor Attaché Nasser S. Mustafa ng POLO-Kuwait.

Pinasalamatan ni Mustafa si Bello sa patuloy nitong paghahanap ng paraan upang matulungan ang mga migranteng mangggawa sa mahihirap na sitwasyon sa gitna ng pandemya. LIZA SORIANO