COTABATO- DEAD on the spot ang tatlong kasapi ng Citizen Armed Forces Geographical Unit (CAFGU) nang tambangan ng mga armadong kalalakihan kahapon ng umaga sa lalawigang ito.
Sa ulat ng militar at Cotabato PPO bandang ala-5:30 ng umaga isinagawa ng mga hinihinalang lawless element na kumikilos sa lalawigan ang pag-ambush sa grupo ng para military na papauwi na sana mula sa kanilang duty.
Agad na nasawi sina Ariel Cedino Jr., Uy-uy Mancera at Joel Chavez na pawang kasapi ng CAFGU sa ilalim ng 90th Infantry (Bigkis-Lahi) Battalion Philippine Army.
Lumitaw sa pagsisiyasat ng Philippine Army 602nd Brigade na sakay ng motorsiklo ang mga biktima mula sa kanilang kampo at papauwi sa kanilang mga bahay nang pagbabarilin pagsapit nito sa Barangay Manaulanan, Pikit, Cotabato ay bigla itong inambus ng mga hindi kilalang armadong kalalakihan.
Agad na tumakas ang mga suspek nang magresponde ang mga sundalo, pulis at mga kasamahan nilang mga Cafgu.
Target naman ngayon ng hot pursuit operation ang mga tumakas na grupo sa likod ng pananambang sa tatlong CAFGU. VERLIN RUIZ