SWAK sa selda ang tatlong security guard na nagpangap na pulis matapos maghasik ng gulo sa isang bar sa Makati nitong Abril 21.
Sa report na isinumite ng Makati City police sa Southern Police District (SPD), nag-inuman ang tatlo sa isang bar sa A. Venue, Makati Ave., Barangay Poblacion, Makati City.
Napag-alaman sa report na nilapitan ng isa ang singer ng bar at nag-request ng kanta ngunit nang hindi ito agad napagbigyan na tugtugin dahil marami ang naunang nagrequest sa kanya ay doon na siya nagpakilalang pulis at nagsimula ng gulo at pananakot sa kapwa customer ng bar.
Sa pagpapakilala bilang pulis ay isang pulis ay magalang na hinanap ng singer ang kanyang pagkakakilanlan o ID ngunit lalo itong nagalit at binantaan ang lahat ng umaawat sa kanya.
Para hindi na lumala pa ang gulo ay dito na tumawag ng responde ang bar sa Poblacion police Substation na siya namang agad na dumating upang maawat ang mga nagwawalang suspek.
Sa halip na tumigil ay binastos ang mga pulis kaya inaresto na ang mga ito saka natuklasang hindi naman pulis. MARIVIC FERNANDEZ