RIZAL-ARESTADO ang tatlong drug suspects kabilang ang isang babae nang salakayin ng pinagsanib na puwersa ng mga operatiba ng Antipolo City Police Station at PDEA 4A ang Drug den sa lungsod ng Antipolo.
Kinilala ang mga nadakip na sina Lea Balleteros alyas “Lea”; Arnold Antor alyas “Kulas” at Marvin Regalario alyas “Negro.”
Ayon sa ulat, kasama ng Antipolo City Police Station ang PDEA 4A nang isagawa ang buy-bust operation sa isang bahay na umano’y drug den sa Angeles Compound, San Lorenzo, Brgy. San Roque ng naturang lungsod.
Sa nasabing operasyon, nakumpiskahan ang mga suspek ng shabu na nagkakahalaga ng P103,500, drug paraphernalias, 500 peso bill na buy bust money at isang unit ng cellphone.
Nahaharap sa kasong paglabag sa RA 9165 ang tatlong naarestong drug suspects.
Samantala, umapela naman ang Antipolo City local government sa mga may drug-related concerns o may impormasyong na maaaring ipagbigay-alam sa mga kinauukulan. ELMA MORALES
