CAVITE – KALABOSO ang 13 drug pushers at 3K quarantine violators sa isinagawang anti-criminality drive ng pulisya sa iba’t ibang lungsod at bayan sa lalawigang ito sa loob lamang ng 24-oras kahapon.
Base sa police report, umabot sa 13 drug personalities ang nasakote sa inilatag na 8 buy-bust operations sa General Trias City, Dasmarinas City, bayan ng Carmona at Naic sa Cavite.
Nasamsam sa 13 drug pushers ang 41 plastic sachet drug money, drug paraphernalias at marked money na ginamit sa anti-drug operation.
Samantala, nasakote naman ang 32-anyos na security guard ng Zodiac Security Agency na si Michael Lucion y Esgana matapos magpaputok ng baril sa bahagi ng Sitio Malipay, Brgy. Molino 4, Bacoor City.
Nakumpiska kay Lucion ang isang cal.38 revolver na kargado ng bala at mga bala ng ibat ibang uri ng baril kung saan may tumawag sa himpilan ng pulisya mula sa isang concerned citizen na siyang dahilan ng pagkaaresto nito.
Umabot naman sa 3, 048 quarantine violators provincewide ang nalambat ng pulisya kung saan karamihan ay walang suot na face mask, improper wearing ng facemask, social distancing at paglabag sa curfew hours. MARIO BASCO