ARESTADO ang apat na bagong identified drug personalities kabilang ang isang cashier sa isinagawang buy bust operation ng pulisya sa magkahiwalay na lugar sa Malabon City.
Ayon kay Malabon police chief Col. Albert Barot, dakong alas-4:30 ng madaling araw nang magsagawa ang mga operatiba ng Station drug Enforcement unit (SDEU) sa ilalim ng pangangasiwa ni Lt Alexander Dela Cruz ng buy bust operation sa Alupihan Dagat Brgy. Longos.
Kaagad sinunggaban ng mga operatiba sina Lloyd Cabueňas, 40-anyos; Paul Cabueňas, 42-anyos at Jonalyn Ponti alyas “Jho”, 36-anyos, cashier, pawang ng Brgy. Longos, matapos bentahan ng P500 halaga ng shabu ang isang police poseur-buyer.
Ani SDEU investigator MSg Randy Billedo, nakumpiska sa mga suspek ang tinatayang nasa 4.57 gramo ng shabu na may standard drug price P31,076 at marked money.
Nauna rito, natimbog din ng kabilang team ng SDEU si Marvin Rosit alyas “Abeng”, 29-anyos, construction worker ng No. 69 Orange Road sa buy bust operation sa Atis Road, Brgy. Potrero dakong ala-1:30 ng madaling araw.
Nasamsam sa kanya ang tinatayang nasa 10 gramo ng shabu na may standard drug price P68,000 at P500 marked money.
Nahaharap ang mga naarestong suspek sa kasong paglabag sa RA 9165 o Comprehensive Dangerous Drug Act of 2002. EVELYN GARCIA