PANGUNGUNAHAN ni International Master Angelo Abundo Young, isang eight-time Illinois, USA champion, ang kampanya ng Pilipinas sa Penang International Open na gaganapin sa April 8-12 sa Malaysia.
Sasabak din sa torneo sina FIDE Master (FM) Christopher Castellano, National Master (NM) Almario Marlon Bernardino Jr., at Candidate Master Jason Rojo.
Ang 60-anyos na si Young ay pumangatlo sa GM Rosendo Carreon Balinas Jr. Open Rapid Chess Tournament noong nakaraang March 23.
“I’m ready. I hope luck is on my side,” wika ni Young, na tumapos eighth overall sa 2019 World Seniors Chess Championships sa Bucharest, Romania.
“My morale is high because of the full support given to me by my good friend FM/AGM Angelito “Anji” Camer, NM Bernardino Jr. and my son Brian Angelo,” dagdag ng 1982 national junior champion.
Pinasalamatan ni Young, kasalukuyang head coach ng Emilio Aguinaldo College chess team, ang Penang Chess Association na pinamumunuan nina Atty. See Swee Sie at Madam In Hooi Teh sa pag-imbita sa kanya.
Ang mga Filipino chess player ay mapapalaban sa mga kilalang player tulad nina FIDE Master Yu Tian Poh, Woman Candidate Master Jia-Tien Chua, Siang-Zhe Chua at Looi Xin Hao ng Malaysia, Nathanael Dieudonne B. Simanihuruk at Maximiliano Marrhuimawan ng Indonesia, Jamison Edrich Kao ng Hongkong, Martin Greenwood ng England at Paul Eggers ng USA.
CLYDE MARIANO
