SA kulungan magdiriwang ng pasko ang apat na tulak ng iligal na droga makaraan maaresto at positibong makumpiska ng shabu na aabot sa halagang P350,000 sa ikinasang buy bust operation sa Baseco Compound, Port Area, Maynila.
Nadakip ng pulisya ang target suspek na si Norma Batua,40-anyos,residente ng 12th Street,Barangay 650,Port Area.
Naaresto rin sa operasyon ang sinasabing buyer ni Batua na sina alyas ” Toto” miyembro ng Batang City Jail, residente ng Baseco Compound, Port Area; isang alyas “Murphy”, 39-anyos,kaanib ng Sputnik Gang,at isang alyas ” Danica” na pawang residente ng 1933 Tioco St.,sa Barangay 91 sa Tondo na kapwa mga biyahero.
Sa ulat ni Lt.Col. Robert Domingo, Station Commander ng Manila Police District – Station 13 ,ikinasa ang operasyon sa nasabing lugar kung saan nagpanggap na bibili o false buyer ang isang operatiba ng nasabing istasyon.
Nakuha sa mga suspek ang anim na plastic sachet na naglalaman ng shabu na tumitimbang ng 51.9 na gramo na may katumbas na halagang nasa P352, 000.00.
Mahaharap sa kasong paglabag sa RA9165 Sec 5 at 11 ang tulak ng droga na si Batua, habang RA9165 Sec 11 naman ang tatlong iba pa. PAUL ROLDAN