40K TESTING CAPACITY KADA ARAW NAAABOT NA

UMAABOT na sa 40,000 ang testing capacity ng bansa sa coronavirus disease o COVID-19 sa kada araw.

Sinabi ni  COVID-19 Response Deputy Chief Implementer Vince Dizon na plano ng gobyerno na paigtingin ang pagsisikap nito sa paglaban sa virus sa pamamagitan ng pag-abot sa target na 50,000 tests sa kada araw ngayong buwan ng Hunyo.

Mayroon nang 41 Reverse Transcription – Polymerase Chain Reaction (RT-PCR) laboratories at 13 genexpert machines ang bansa habang 141 ang pending applications para sa accreditation ng CO­VID-19 testing centers.

Hinimok ni Dizon ang publiko na tumingin sa positivity rate ng bansa na nasa 6% hanggang 7%. Ang positivity rate ay ang porsiyento ng mga taong nagpopositibo sa virus mula sa kabuuang bilang ng mga sumasailalim sa test.

Kaugnay nito ay  binuksan na   ang molecular laboratory sa Cavite, Laguna, Batangas, Rizal at  Quezon sa loob ng  compound  ng  Ospital ng Imus sa  Cavite makaraang  aprubahan ng  Department of Health (DOH)  ang license to operate  nito upang epektibong masuri ang mga  COVID-19 case  rito at maging sa ibang bayan.

Pinuri ni DOH Regional Director Eduardo C. Janairo ang  local government  ng Imus sa pangunguna ni  Mayor Emmanuel L. Maliksi  sa inisyatiba para rito.  “Ito ang dapat na matupad sa ating mga LGU sa a­ting rehiyon, ang magkaroon ng tulungan upang makapagtaguyod ng mga proyektong magdudulot ng pagbabago lalo na sa larangan ng pangkalusugan. Kailangang ma­ging independent na tayo sa mga health facilities sa Metro Manila at palakasin natin ang kakayahan ng ating mga pasilidad upang hindi na tayo umasa pa sa mga pagamutan sa labas ng ating rehiyon.”

“Ang laboratoryong ito ay isang napakagandang proyekto upang masagot ang panga­ngailangang pangkalusugan ng ating mamamayan. Ito ay magagamit natin hindi lang ngayong panahon ng epidemya kundi sa susunod pang henerasyon at sa mara­ming paraan at pagsusuri ng iba pang mga sakit upang mabigyan natin ng agarang lunas,” pahayag pa ni Janairo.

Ang  testing facility  ay ikalawang LGU- instituted laboratory  sa bansa. Ang una ay nasa  Marikina.

Ito naman ang ika- 54 DOH-accredited COVID-19 Testing Facility sa bansa.