5 NARCO SUPPLIERS TIMBOG SA P58-M SHABU

CAVITE – KALABOSO ang binagsakan ng limang notoryus narco traders makaraang nakumpiskahan ng P58 milyong halaga na shabu sa inilatag na buy-bust operation ng mga operatiba ng Manila PNP, Cavite PNP, at PDEA-4A sa bahagi ng Barangay Bayan Luma 3, Imus City sa lalawigang ito kamakalawa ng gabi.

Ang mga suspek na miyembro ng Tamano Drug Group na nagmula sa Maguindanao at nakatira sa #158 Tansui Street, Sara Subd.sa nasabing barangay ay nakilalang sina Tamano Daud y Daud na gumamit ng alyas George Daud y Mama, 41-anyos; Ismael Daud y Gogo, 24-anyos; Omar Redia y Ahmad, 43-anyos; Bainor Maguid y Ayuna, 23-anyos at si Norma Maguid y Ayuna, 35-anyos.

Base sa police report na nakarating sa Camp Pantaleon Garcia, ang mga suspek ay supplier ng shabu at ibang illegal drugs sa City of Manila, Quezon City at Rizal province kung saan may ugnayan din sa sinasabing high value target na si Montessi Sabal.

Sa pangunguna ni Lt. Col. Brannon, nasakote ang mga suspek at nasamsam sa mga ito ang 82 small plastic sachet na shabu, 3 big plastic sachet na shabu na 8.533 kilograms na may street value na P 58,024,400.00, marked money, drug paraphernalias, 2 sling bags, 6 unit na cellphones, ibat ibang uri ng bala ng baril, isang cal. 9mm pistol at isang cal.45 pistol.

Isinailalim na sa drug test ang mga suspect habang pina-chemical analysis naman ang shabu na nakumpiska na gagamiting ebidensiya sa pagsasampa ng kaukulang kaso. MHAR BASCO