5 TERORISTA UTAS SA ENGKUWENTRO

LANAO DEL NORTE- ISANG madugong law enforcement operation ang naganap kamakalawa ng umaga na ikinasawi ng limang armadong lalaki nang lumaban sa tropa ng pamahalaan sa lalawigang ito.

Ayon kay Lt. Gen. William Gonzales, pinuno ng  Western Mindanao Command (WestMinCom), nagkasa ng law enforcement operation ang mga tauhan ng Joint Task Force (JTF) ZamPeLan at PNP-Criminal Investigation Detection Group (CIDG) IX At CIDG Lanao del Norte.

Target umano ng  ope­ration ang mga kaalyado ng Daulah Islamiyah terrorist group. Armado ng warrant of arrest na inisyu ng korte,  sinalakay ng militar at pulis ang pinagtataguan ng mga target personalities sa Barangay Bangco, Sultan Naga Dimaporo, Lanao Del Norte.

Subalit, bago pa ma­kalapit sa target areas ay sinalubong na ang mga awtoridad ng sunod sunod na putok mula sa pitong armadong lalaki sa pangunguna ng isang  Uya Dama alias Aragon kaya nagkaroon ng matinding sagupaan na tu­magal ng kalahating oras.

Base sa inisyal report ng engkwentro na  ibinahagi ng WESTMINCOM, limang kasapi ng armadong grupo ang napaslang kabilang si Uya Daman na pangunahing target ng LEO , may isang nasugatan habang isa pa ang nadakip.

Wala naman nasugatan sa panig ng government troops.

Samantala, sa isinagawang clearing operation sa encounter site ay nasamsam ang tatlong  M16 rifles; tatlong  Cal .30 Garand rifles; dalawang Cal .45 pistols; dalawang  hand grenades; Cal .30; ammunition; 5.56 ammunitions; M16 rifle magazines; isang  bandolier; dalawang  sling bags at isang  backpack.

“Our troops exhaust their effort to decapacitate armed groups that defer the attainment of resounding peace in our area of responsibility (AOR). The JTF ZamPeLan continuously coordinates with our partners from the Phi­lippine National Police to reinforce the security operations against the remaining militant groups in our AOR,” ayon pa kay Lt. Gen. Gonzales.

VERLIN RUIZ