50% NG 3.7-M NABAKUNAHAN NA KONTRA TIGDAS

INAASAHAN  ng Department of Health (DOH) na sa pagtatapos ng buwan ng Marso ay unti-unti nang bababa ang naitatala nilang mga kaso ng tigdas sa bansa.

Inamin naman ni DOH Undersecretary at Spokesperson Eric Domingo na sa kasaluku­yan ay may mga naitatala pa rin silang tinatamaan ng sakit.

Gayunman, dahil mas marami ng kabataang nabakunahan ay tiyak aniyang unti-unti nang mababawasan ang mga nabibiktima ng sakit sa mga susunod na araw.

Ibinalita rin niya na sa ngayon ay halos naabot na nila ang kalahati o 50 porsiyento ng 3.7 milyong kabataan na target nilang mabakunahan laban sa tigdas.

Paiigtingin pa aniya nila ang kanilang immunization drive sa mga liblib at malalayong lugar at nakikipag-ugnayan na sila sa Philippine National Po-lice (PNP) para maisagawa ito.

Batay sa datos ng DOH, mula Enero 1 hanggang Marso 2, ay nakapagtala na sila ng 16,349 measles cases sa bansa at 261 sa kanila ang kumpirma-dong nasawi.

Inaasahan namang magla­labas nang muli ang DOH ng bagong datos ng sakit anumang araw mula ngayon. ANA ROSARIO HERNANDEZ