50 PINOY SA BAHRAIN BALIK-PINAS NA

NAKAUWI na ang nasa 50 Pinoy sa tulong na rin ng embahada ng Pilipinas sa Bahrain.

Ayon sa Department of Foreign Affairs (DFA), nitong Enero 30  ay umalis ang naturang mga Pinoy sa Manama at dumating sa bansa noong Lunes na pawang sakay ng Gulf Air flight GF154.

Nabatid na ang 50 Pinoy ang unang batch na nakauwi ng Pilipinas makaraang ilunsad ng DFA ang Embassy’s Repatriation Program para sa taong 2022. Ang mga ito ay kinabibilangan ng mga buntis, overstaying, deportee, medical patient, menor de edad, at ward mula sa  Embassy Shelter.

Sa tulong na rin ng Overseas Workers Welfare Administration (OWWA)-Bahrain, sa pakikipag-ugnayan sa OWWA  Manila main office,  ay inihahanda na ang quarantine facilities para sa 50 Pinoy na nakauwi na ng bansa.

Ang pag-uwi ng 50 Pinoy  ay sa koordinasyon na rin ng  Bahrain’s Ministry of Interior, partikular  ng  National, Passport and Residence Affairs  at mga opisyal ng  immigration.

Patuloy ang ibinibigay na tulong ng embahada sa mga Pinoy na stranded sa Bahrain kaugnay pa rin ng COVID-19 response program ng pamahalaan.

Para sa iba pang impormasyon maaaring bumisita sa https://www.manamape.dfa.gov.phor https://www.facebook.com/PHLinBahrain. LIZA SORIANO