6 BALA ITINANIM NG 2 MENOR SA KELOT

COTABATO CITY- HINDI na umabot nang buhay sa Cotabato Regional and Medical Center (CRMC) ang 36-anyos na lalaki matapos pagbabarilin ng dalawang menor sa lungsod na ito.

Ayon sa Cotabato City Police Office, may edad lamang na 14 taon at 16 ang mga salarin.

Nakilala ang biktima na si Habid Balabaran,36-anyos, may asawa at residente ng Brgy. Tamontaka Cotabato City.

Lumalabas sa pagsisiyasat na habang naglalakad ang biktima sa Jose Lim Sr. Street kanto ng Bonifacio Street, Brgy. Poblacion 6 ay dinikitan ito ng dalawang teenager.

Subalit biglang pinagbabaril ang biktima ng dalawang menor na suspek  na kapwa mga residente ng Kapinpilan, Barangay Kalanganan Mothern ng nasabing siyudad gamit ang kalibre.45 na pistola.

Mabilis namang tumakas ang mga salarin patungo sa liblib na lugar sa lungsod ng Cotabato, subalit makalipas ang ilang oras ay nadakip din ang mga ito.

Nagawa pang maitakbo sa Cotabato Regional and Medical Center (CRMC) ang biktima ngunit hindi na ito umabot ng buhay sanhi ng anim na tama ng bala na inabot nito .

Nakapiit na sa Costudial Facility ng Cotabato City Police Office ang da­lawang menor habang ina­alam ang motibo ng mga ito sa pamamaslang . VERLIN RUIZ