6 DRUG PEDDLERS SWAK SA REHAS NA BAKAL

CAVITE – SWAK sa selda ang anim na notor­yus na drug peddlers makaraang masakote ng pulisya at Philippine  Drug Enforcement Agency (PDEA 4A) sa ikinasang anti-drug operation sa bahagi ng Barangay Sampaloc 4, Dasmarinas City, kahapon ng madaling araw.

Isinailalim sa tactical interrogation at pormal na kinasuhan ang mga suspek na sina alyas Aldrin, Stephen Villas y Daculiat, 35; Roberto Rivas y Es-tola, 33; Richard Asporia y Buhawe, 24; Rogelio Asporia y Gonzales, 56; at si Mary Jane Rivera y Pudong Bayan, 32, pawang nakatira sa nabanggit na barangay.

Sa ulat ni PO3 George Fajardo na nakarating sa Camp Pantaleon Garcia, lumilitaw na masusing isinailalim sa surveillance ng pulisya ang mga sus-pek na pawang nasa drug watchlist.

Sa tulong na rin ng ilang concerned citizen ay positibo ang mga suspek sa pagtutulak ng droga kung saan ginagawang drug den ang kanilang bahay.

Dito na ikinasa ang anti-drug operation laban sa mga suspek kung saan narekober naman ang 10 plastic sachet na shabu (3.45 gramo) at P200 marked money na ginamit ng mga awtoridad sa pag-aresto.

Sa kasalukuyan ay unti-unting nababawasan ang paglaganap ng droga sa nasabing lugar dahil sa pagkakaaresto sa mga suspek.        MHAR BASCO