BULACAN-ANIM na drug pushers na kabilang sa drug watchlist ang nadakip ng pulisya sa serye ng buy-bust operation na ikinasa ng Station Drug Enforcement Unit(SDEU)sa mga bayan ng Balagtas, Paombong, Calumpit, San Ildefonso at Baliuag sa lalawigan ito kamakalawa ng gabi hanggang kahapon ng madaling araw.
Ayon kay Col.Rommel J. Ochave, Acting Provincial Director ng Bulacan PNP, Kinilala ang mga suspek na sina Dennis Dizon at kamag-anak nitong si Rodel Dizon, kapwa nakatira sa Barangay Santol; Gilbert De Guzman ng Barangay Pulong Gubat, pawang sa bayan ng Balagtas; Aaron Serrano ng Barangay Pungo, Calumpit; Noel Macarilla ng Malipampang, San Ildefonso at Tanny Hemento ng Pagala, Baliuag.
Nabatid na sunod-sunod na inilatag ng operatiba ng SDEU sa mga bayan ng Balagtas, Paombong at Calumpit ang buy-bust operation na huling ikinasa pasado alas-12 ng madaling araw kahapon sa Barangay Malipampang, San Ildefondo at Barangay Pagala, Baliuag kung saan nasakote ang mga suspek.
Nakarekober ang awtoridad sa sunod-sunod na drug bust operation ng kabuuang 20 pakete ng shabu at buy-bust money na kaagad naman ipinasailalim sa drug test ang mga suspek at nahaharap ngayon sa kasong paglabag sa Section 5 at 11 ng RA 9165. MARIVIC RAGUDOS