7.3M PINOY JOBLESS SA GITNA NG COVID-19 CRISIS

PUMALO sa record-high 73 million ang bilang ng mga Pinoy na walang trabaho noong Abril sa gitna ng coronavirus disease 2019 (COVID-19) pandemic, ayon sa Labor Force Survey ng Philippine Statistics Authority (PSA).

“Unemployment rate rose to 17.7%, equivalent to 7.3 million unemployed Filipinos in the labor force in April 2020,” wika ni National Statistician Claire Dennis Mapa.

Ang 17.7%  unemployment rate ay mas mataas kumpara sa 5.3% noong Enero at sa 5.1% noong nakaraang taon, na nangangahulugan ng karagdagang 5 million na katao na walang trabaho.

“This is a record high in the unemployment rate reflecting the effects of the economic shutdown to the Philippine labor market due to COVID-19,” ani Mapa.

Para mapigilan ang pagkalat ng COVID-19 ay nagpatupad ang pamahalaan ng mahigpit na quarantine measures mula Marso  17 hanggang Mayo 31. Dahil sa lockdown ay napilitan ang ilang negosyo na pansamantalang magsara na nakaapekto sa milyon-milyong manggagawa.

Sa datos ng PSA ay lumitaw na 13 million Filipinos ang may trabaho subalit hindi nakapag-report sa trabaho, na katumbas ng 38.4%.

Ang Arts, Entertainment, and Recreation sector ang may pinakamalaking pagbaba sa bilang ng employed workers sa 54% dahil kinailangang huminto sa operasyon ang movie at  television productions.

Sumusunod ang mga manggagawa sa electricity, gas, steam at airconditioning supply na may 43.1%  na pagbaba, information and communication firms (40.6%) , at accommodation and food service activities na may 35.8% decrease.

Ayon pa sa survey ng PSA, ang mga Pinoy na may trabaho ay bumaba sa 33.8 million, o katumbas ng  82.3% ng merkado. Mas mababa ito kumpara sa 94.7% sa pagsisimula ng taon.

Ang lahat ng rehiyon ay nagtala ng double-digit unemployment rate, kung saan ang pinakamataas ay sa Bangsamoro Autonomous Region in Muslim Mindanao (BARRM) na may 29.8%.

Sumusunod ang Region III o Central Luzon, at ang Cordillera Administrative Region (CAR) na may 27.3% at  25.3%, ayon sa pagkakasunod.