LANAO DEL SUR- PITONG bangkay ng mga kasapi ng Daula Islamiya – Maute Group ang nadiskubre ng militar habang nasa 45 high powered firearms at 5 kilo ng shabu ang nasamsam matapos ang isinagawang air sortie ng Philippine Air Force at ground assault ng Philippine Army sa Maguing sa nasabing lalawigan.
Sa pagsisimula ng ika-125 anniversary ng Philippine Army na may temang: “Philippine Army @ 125: Kapayapaan Para Sa Lahat” ay tiniyak ni Army commanding general Lt. Gen Romeo Brawner na hindi na mauulit pa ang madugong Marawi siege na kumitil ng magigit sa 100 tauhan ng pamahalaan
Ayon kay Brawner, kasalukuyan pa nilang inaalam kung kabilang si Abu Zacariah, sinasabing new emir ng ISIS sa Southeast Asia sa pitong Islamic State terrorist na napaslang sa isinagawang pag-atake sa kanilang kuta sa bayan ng Maguing.
Sa update kahapon ni Western Mindanao Command Chief Lt. Gen. Alfredo Rosario, Jr. bukod sa 45 serve crew at high powered firearms ay nakarekober din ang kanilang mga tauhan ng 22 Improvised Explosive Devices at ilang anti-personnel mines sa isinagawang pursuit operations kasunod ng close air support and combat operations sa Barangay Ilalag, Maguing,Lanao del Sur.
May narekober din na humigit kumulang sa limang kilo ng shabu ang kanilang operating troops.
Hinihinalang nagbabalak ang grupo ni Abu Zacariah na lumikha ng kaguluhan sa panahon ng paggunita ng Ramadan at sa nalalapit na National and Local Elections.
Nabatid na pinag-aaralan na rin umano ng mga teroristang grupo ang paggawa ng rocket at mortar ammunitions.
Kinilala naman ni Maj. Gen. Generoso Ponio, Commander Joint Task Force ZamPeLan ang nasawing sundalo na si Private Clint Rey Armada na kasamang sumalakay ng 51st Infantry Battalion na pinamumunuan ni Lt. Col. Payapaya at 55th Infantry Battalion under Lt. Col. Villanueva at iba pang supporting units.
Kabilang sa nakunpiska na war materials ang tatlong cal. 50 Machine Guns with Tripod,1 cal. 30 Machine Gun with Tripod, 2 M60 General-Purpose Machine Guns,12 5.56mm M16 rifles,1 M653 rifle,1 M4 Carbine,1 20-inch AR-15 rifle,5 7.62mm M14 rifle,1 7.62mm M4 rifle,6 na Rocket-Propelled Grenade Launchers,2 M203 Grenade Launchers, 6 na improvised 50 caliber Sniper rifles,1 Garand rifle,1 Browning Automatic rifle (BAR), 1 cal. 22 AK47, at 1 shotgun. VERLIN RUIZ