PAMPANGA – PATAY sa vehicular accident ang pito katao kabilang ang isang bata habang may 15 iba pa ang nasugatan nang tumagilid at masalpok nang rumaragasang pickup truck ang sinasakyan nilang passenger jeep sa Lubao.
Sa police report ng Lubao Municipal Police Station, lulan ng pampasaherong jeep ang 22 pasahero at patungo sana ito sa bayan ng San Fernando.
Wasak ang jeep dahil sa lakas ng impact matapos na masalpok ng truck.
Patuloy ang imbestigasyon ng pulisya sa aksidente, habang pansamantalang nasa kustodiya ng Lubao-PNP ang driver ng pickup na nakilalang si Alexander Domingo.
Una rito, tinatahak ng jeep ang national highway patungong San Fernando bandang alas-6:00 ng gabi nitong Miyerkoles.
Base sa imbestigasyon ng pulisya, unang nabangga ang jeep nang biglang tumawid ang isang pickup sa Abad Santos Ave., Barangay San Agustin alas-6 ng gabi.
Nawalan ng kontrol ang drayber ng jeep at natumba ang sasakyan sa kabilang lane. Nabangga naman ito ng paparating na dropside truck. VERLIN RUIZ
