CEBU- DAHIL sa mabilis na pagkilos ng mga awtoridad ay nailigtas ang isang 8-anyos na batang babae na dinukot at isinilid sa luggage suitcase na may gulong para agad na mailayo mula sa kanilang bahay sa Mandaue City.
Ayon sa ulat, dahil sa CCTV ay agad na natunton ng Mandaue City Police office ang pinagdalhan sa batang kinidnap na isinilid sa itim na luggage trolley suitcase sa Barangay Bakilid, ng nasabing siyudad kamakalawa ng hapon.
Nakita sa CCTV na itinutulak ng isang lalaki ang maletang may gulong palabas ng bahay.
Agad namang humingi ng tulong sa mga awtoridad ang ina ng bata at kinahapunan agad na pinakilos ng Mandaue City PNP ang kanilang intelligence unit.
Lumitaw sa imbestigasyon na kabisado ng suspek ang pasikot sikot sa bahay dahil katiwala ito ng pamilya ng biktima sa kanilang apartment.
Sinabi pa ni Col. Jeffrey Caballes, Mandaue City Police Station chief na may kinikimkim na galit ang suspek sa lolo at lola ng biktima.
Matapos ang tatlong oras ay naibalik na ang bata sa mga magulang nito sa tulong ng mga tauhan ng Women and Children Protection Desk ng PRO 7 habang inihahanda naman ang kasong kidnapping laban sa suspek.
VERLIN RUIZ