INABANDONA ng isang walang pusong ina ang walong buwang fetus sa harapan ng isang gusali sa Quezon City kahapon ng umaga.
Sa report ng Criminal Investigation and Detection Unit ng Quezon City Police District (CIDU-QCPD), bandang ala-5 ng umaga nang matagpuan ang duguang lalaking fetus na nakablot sa plastic bag sa center island sa harapan ng Aberdeen Court, sa Quezon Ave., Brgy. West Triangle, Quezon City.
Batay sa imbestigasyon ni Cpl Ryan Deo J Cadlawon of Masambong Police Station (PS-2), QCPD, nag-iikot umano ang guwardiyang si Marlon Payanay nang mapansin ang isang plastic bag sa harapan ng Aberdeen.
Dahil dito ay inusisa ng guwardiya ang nilalaman ng plastic bag at doon ay bumungad sa kaniya ang duguang fetus kaya agad itong inireport sa mga opisyal ng barangay.
Inaalam pa ng mga awtoridad kung sino ang ina na nag-iwan ng fetus sa harap ng nasabing gusali. EVELYN GARCIA