ARESTADO ang walong nasa drug watchlist kabilang ang tatlong magkakapatid sa isinagawang buy bust operation ng mga pulis sa Valenzuela City, kahapon ng madaling araw.
Ayon kay Valenzuela Police Chief P/Col. Carlito Gaces, alas-12:30 ng madaling araw nang ikasa ng mga operatiba ng Station Drug Enforcement Unit (SDEU) sa pangunguna ni P/Capt. Segundino Bulan Jr., ang buy bust operation kontra Felipe Taller alyas “Pido”, 25, Imelda Mallari, 38, at Josephine Mallari, 54, sa bahay ng magkakapatid na Mallari sa 308 Dulong Tangke, Malinta sa koordinasyon sa Philippine Drug Enforcement Agency (PDEA).
Matapos iabot ng mga suspek ang isang sachet ng shabu kay PCpl Mendoza III na umaktong buyer kapalit ng P200 marked money ay agad nag-bigay ang pulis ng signal sa back-up na mga operatiba na mabilis namang lumusob saka sinunggaban ang mga ito.
Narekober kay Taller ang tatlong sachet ng shabu, buy bust money, P600, coin purse at plastic bag na naglalaman ng transparent plastic sachets habang nakuha naman kay Imelda ang dalawang sachet ng shabu at P60 bill.
Nasakote rin sa operasyon si Joseph Mallari alyas “Baba”, 46, Jaymark Pacheco, 25, Marvin Barrios, 26, Cornelio Enriquez, 27, at Jay Bandojo, 41, hair stylist, matapos maaktuhang sumisinghot ng shabu sa loob ng hinihinalang drug den.
Ayon kay SDEU PSSg Julius Congson, nakumpiska sa mga suspek ang dalawang sachet ng shabu, dalawang nakabukas na sachet na may bahid pa ng shabu at ilang drug paraphernalias. VICK TANES
Comments are closed.