9,095 BAGONG GUMALING SA COVID

INIULAT ng Department of Health (DOH) na nakapagtala pa sila ng 8,167 bagong kaso ng COVID-19 sa bansa hanggang araw ng Lunes.

Batay sa case bulletin no. 506, sinabi ng DOH na dahil sa naturang bagong bilang, umaabot na ngayon sa 1,605,762 ang total COVID-19 cases sa Pilipinas.

Gayunman, sa naturang bilang, 3.9% na lamang o 62,615 ang aktibong kaso o nagpapagaling pa mula sa karamdaman kabilang dito ang 93.9% ang mild cases, 2.1% ang severe, 1.48% moderate, 1.3% asymptomatic, at 1.2% ang critical.

Mayroon namang karagdagang 9,095 na bagong gumaling mula sa karamdaman.

Sa kabuuan, umaabot na ngayon sa 1,515,054 ang total COVID-19 recoveries sa bansa o 94.4% ng total cases.
Samantala, mayroon namang 77 pasyente ang sinawimpalad na bawian ng buhay dahil sa kumplikasyong dulot ng COVID-19.

Sa ngayon, mayroon nang 28,093 total COVID-19 death toll sa bansa o 1.75% ng total cases.

Ayon sa DOH, mayroon ding 94 duplicates ang inalis nila mula sa total case count, kabilang dito ang 20 recoveries.

Mayroong 19 kaso na unang na-tagged bilang recoveries ngunit malaunan ay natukoy na aktibong kaso pa pala ang mga ito.

Mayroon namang 29 kaso na unang na-tagged na recoveries ngunit malaunan ay natukoy na binawian na pala ng buhay sa pinal na balidasyon. Ana Rosario Hernandez

Related posts:

9,055 BAGONG KASO NG COVID-19 COVID-19 CASES TULOY SA PAGBABA, 9,868 BAGONG KASO NAITALA