CAMARINES NORTE- PATAY ang isang high value target matapos na mauwi sa engkuwentro ang buy-bust operation sa Talisay.
Kinilala ni PBGen. Jonel Estomo ang napaslang na bigtime pusher na si Christian Sabaria Serrado 40 anyos , ng Brgy Larap, Jose Panganiban, Camarines Norte at tinuturing na isa sa Regional level high value individual priority targets ayon sa PNP Data Base Drug Personalities.
Ayon kay Estomo bandang alas-4:09 ng madaling araw Disyembre 13, 2021 ikinasa ang anti-narcotics operation sa Purok 2, Brgy Gabon, sa bayan ng Talisay ng pinagsanib na puwersa ng PNP-PRO5 ODRDO-RPDEU5 team kasama ang Camarines Norte PPDEU/PIU (lead unit) at Talisay MPS sa ilalim ng pangangasiwa ni PCOL Julius D Guadamor, Provincial Director ng ng Camarines Norte PNP.
Sa pakikipag ugnayan sa Philippine Drug Enforcment Agency RO5 ay isinagawa ang joint entrapment at buy-bust operations laban sa suspek na miyembro ng bigtime drug syndicate at may malawak na operasyon sa Camarines Norte at mga kalapit na lalawigan sa Bicol Region.
Kumagat sa pain ang suspek at pumayag na magbenta ng 50 gramo ng shabu sa halagang P340,000.
Subalit sa kasagsagan ng bentahan napuna ng suspek na may mga alagad ng batas sa paligid kaya mabilis itong bumunot ng dala niyang kalibre 45 pistola at pinaputukan ang mga pulis.
Napilitang gumanti ng putok ang mga awtoridad at nahagip si Serrado ng mga punglo.
Nagawa pa itong itakbo sa Camarines Norte MDRRMO subalit dneklrang dead on arrival ng attending physician. VERLIN RUIZ