NAGPAABOT ng ayuda sa mga lalawigan ng Abra at Cagayan ang ACT-CIS party-list, sa pamamagitan ng Department of Social Welfare and Development (DSWD), para sa muling pagbangon ng mga mamamayan doon na labis na naapektuhan ng pananalasa ng bagyong Egay.
Ayon kay ACT-CIS Rep. Erwin Tulfo, tig-P4 milyon ang napagkasunduan ng kanilang grupo na ipadala sa bawat lalawigan.
Anang mambabatas, “Hindi man po ganun kalaki, pero kahit papaano may maidagdag ang pamahalaang panlalawigan sa kanilang “recovery efforts” funds dahil balita po namin daan-daang milyon ang kailangan pa nila.”
Ang Abra ang pinakamatinding tinamaan ng dumaang si “Egay” dahil sa mga landslide habang ang Cagayan naman ay lumubog sa tubig-baha.
Maraming kabahayan ang nasira sa Abra habang pagkawasak naman ng pananim ang naging problema sa Cagayan.
Kapwa naman nagpasalamat sina Cagayan Gov. Manuel Mamba at Abra Province League of Municipalities President Joseph Bernos sa tulong na ibinigay ng ACT-CIS Partylist.
“We will always be grateful sa ACT-CIS lalo na kay Cong. Erwin dahil ‘di kami nakakalimutan kahit noong nasa DSWD pa siya,” ani Mayor Bernos.
Pinasalamatan naman ni Tulfo si DSWD Sec. Rex Gatchalian sa agarang tulong para sa mga nasabing lalawigan.