“AKO po ay isang Pilipino at lalong-lalo na hindi ako isang spy!”
Ito ang iginiit ni Bamban, Tarlac Mayor Alice Guo matapos ang pagdinig ng Senate Committee on Women, Children, Family Relations and Gender Equality kaugnay sa sinalakay na Philippine Offshore Gaming Operations (POGO) sa lalawigan.
Kasabay nito, kinuwestyon ng kampo ng alkalde ang hindi patas na pagdinig dahil na rin sa paulit-ulit na pagtatanong kaugnay sa citizenship ng alkalde.
Sa pagharap naman ng Philippine Statistics Authority (PSA), iginiit ni Atty. Eliezer Ambatali, legal service ng ahensya na ang birth certificate ay isa lamang sa mga dokumentong maaaring magpatunay ng citizenship ng isang tao.
Ipinaliwanag ni Ambatali na kung ang pagbabatayan ang kasalukuyang birth certificate ng alkalde ay maituturinng na ito ay Pilipino.
“Dineclare din po niya na Pilipino din po siya. So based dito sa dokumentong ito, since ang pinagbabasehan po natin sa pag-establish ng citizenship ay yung citizenship ng mother, at ito din po yung mga nakalahad lamang sa birth certificate. Kung ito ay ang pagbabasehan natin, sasabihin natin na ano na, Pilipino nga,” diin ni Ambatali.
Sa nasabing pgdinig, kumasa rin si Guo sa hamon ni Senador Raffy Tulfo na sumalang sa lie detector test upang patunayan na nagsasabi siya ng totoo kaugnay sa kanyang citizenship.
Kasunod ito ng pagtatanong ni Tulfo kaugnay sa relasyon ng pamilya ni Guo kung saan sinabi ng alkalde na hindi nila napag-uusapan ng kanyang ama ang kanyang ina dahil itinuturing nila itong sensitibong isyu.
Sinabi ng alkalde na handa siyang sumalang sa lie detector test kung ito ang makakapagpatunay na hindi siya nagsisinungaling.
Muli ring itinanggi ni Guo na may kinalaman siya sa operasyon ng POGO at lumaki siya sa farm sa Tarlac kasabay ng pahayag na marunong siyang magsalita ng kaunting Kapampangan.
Muli namang magtatakda ng pagdinig ang komite subalit gagawin na itong closed door dahil may mga isyung may kinalaman sa national security.
VICKY CERVALES
