MULING magiging flag bearer si Creamline superstar Alyssa Valdez sa tradisyunal na parade of athletes sa opening ceremony ng Cambodia 32nd Southeast Asian Games sa Biyernes, Mayo 5, sa 60,000-seat Morodok Techo Stadium sa Phnom Penh.
Siya ang excellent choice para sa isang Team Philippines na uukit ng kasaysayan sa SEA Games — magpapadala ng isang female-dominated representation sa parade of nations na isa sa highlights ng opening ceremony para sa unang hosting ng Cambodia sa biennial Games.
“Alyssa best fits our goal of an almost all-female delegation in the opening ceremony,” wika ni Philippine Olympic Committee (POC) president Rep. Abraham “Bambol” Tolentino. “She’s not only the face of Philippine volleyball, but Philippine sports as well.”
Si Valdez ay lilipad patungong Phnom Penh sa Biyernes, sa halip na sa Saturday flight schedule ng women’s national volleyball team.
“It’s such an honor to be the flag bearer for this year’s SEA games. It’s a big responsibility but I’m grateful for the trust given to me once again,” sabi ni Valdez, na siya ring flag bearer ng bansa sa Singapore 2015 Games.
“I first had the opportunity to carry our Philippine flag in 2015 in Singapore and it was an unforgettable experience.”
“I share this with all the women in sports who brought honor and glory to the country,” dagdag ni Valdez.
Sina Tolentino at chef de mission Chito Loyzaga ang tanging lalaki na sasama sa parada.
“This is a first in SEA Games history,” pahayag ni Tolentino patungkol sa female-dominated contingent.
Isusuot ng parade participants ang Francis Libiran-designed white barongs sa ibabaw ng black pants.
Tinawag ni fashion icon Libiran ang kanyang barong creation para sa 32nd SEA Games na “Araw.”
Ang Francis Libiran Araw Barong Tagalog ay gawa sa Philippine jusi fabric at materials at binurdahan ng Philippine flag.
Dinisenyo rin ni Libiran ang barong na isinuot ng Filipino athletes sa 2019 Philippine SEA Games, gayundin noong nakaraang taon sa Hanoi kung saan pinangalanan niya ang kanyang masterpiece na “Agila” ‘na may intricate embroidery na may art deco ng Philippine eagle.
Nilimatahan ng Cambodia SEA Games Organizing Committee sa 50 ang bilang ng mga athleta para sa bawat bansa para sa traditional parade of athletes.
