AMBULANT VENDORS BAWAL SA ILALIM NG ECQ

IPINAGBAWAL ng lokal na pamahalaan ng Taguig ang pagtitinda ng mga ambulant vendors habang ipinatutupad sa buong National Capital Region (NCR) ang enhanced community quarantine (ECQ) ng hanggang Agosto 20.

Nabatid na ang implementasyon ng pagbabawal sa pagtitinda ng ambulant vendors sa kalsada ay base sa Memorandum Circular 21-28 ng Department of Trade and Industry (DTI) at ng Safe City Task Force Advisory No. 49.

Kaya’t binalaan ng pamahalaang lokal ang ambulant vendors na kukumpiskahin ang kanilang mga paninda kapag nahuli bukod pa sa pag-isyu sa kanila ng tiket sa paglabag ng Ordinance No. 24 ng lungsod o “New Normal Ordinance”.

Ayon naman sa Taguig Safe City Task Force (TSCTF) na ipinost sa kanilang Facebook page,ang pagbabawal sa pagtitinda ng ambulant vendors sa mga kalsada sa lungsod ay para na rin sa kabutihan at kaligtasan hindi lamang ng mga nagtitinda kundi pati na rin ng kanilang mga consumer habang nakapailalim ang lungsod sa ECQ.

Sinabi pa ng TSCTF na dahil na rin sa nakapasok na sa lungsod ang mas kinatatakutang Delta variant na mas mabilis makapanghawa kung kaya’t lilimitahan ng lokal na pamahalaan ang kilos ng mga indibidwal upang mapigilan ang pagkalat ng COVID-19.

“Ang mga ambulant vendors o mga naglalako ng kanilang paninda sa kalsada kabilang ang mga nagtitinda ng taho, prutas, gulay at iba pang paninda ay pinagbabawalan na umikot nitong ECQ,” ayon pa TSCTF.

Sa report na inilabas ng Department of Health (DOH) noong Agosto 5 ay mayroon nang limang kaso ng Delta variant ang naitala sa Taguig.

Base naman sa ulat ng Taguig City Health Office (CHO) ng Agos­to 15 ay nakapagtala ang lungsod ng 1,304 na aktibong kaso kabilang na ang 177 bagong kaso ng COVID-19.

Sa kabuuan ay mayroong 32,488 kumpirmadong kaso ng COVID-19 kung saan 30,902 indibidwal ang mga naka-recover na habang 282 naman ang mga namatay dahil sa virus.

Patuloy din ang pagbibigay ng bakuna ng lokal na pamahalaan na sa kasalukuyan ay mayroon nang 530,734 indibidwal ang naturukan ng unang bakuna o 78 porsiyento ng target population na 680,000 habang 275,276 indibidwal naman ay mga fully vaccinated o nakatanggap na ng kanilang ikalawang bakuna. MARIVIC FERNANDEZ

Related posts:

(Sa two-week ECQ) P180-B NAWALA SA EKONOMIYA (Naipamahagi na sa 4.4M indibidwal sa Metro Manila) P4.47-B NA ‘ECQ AYUDA’ (Hanggang sa Mayo 15) ‘ECQ AYUDA’ DISTRIBUTION PINALAWIG (Nag-report sa opisina sa ECQ, MECQ areas) HAZARD PAY SA GOV’T WORKERS (Sa 2-week ECQ) P210-B MAWAWALA SA EKONOMIYA (Sa 2-week ECQ) PUBLIC TRANSPORT TULOY ANG PASADA (Tiniyak ng DA sa panahon ng ECQ) TULOY-TULOY NA DELIVERY NG AGRI PRODUCTS PAGPAPATULOY NG SERBISYO NG MERALCO SA KABILA NG ECQ AT MECQ