NATAGPUANG patay ang American R&B singer songwriter at record producer na si Keith Eric Martin sa loob ng kaniyang inuupahang condominium unit sa Eastwood City, Quezon City nitong Biyernes ng umaga.
Ang 57-anyos na singer na naninirahan sa Pilipinas ay kilala sa kaniyang mga awitin at romantic love songs partikular ang pinasikat na “Because of you”.
Batay sa inisyal na report ng Eastwood Police Station, nadiskubre ang naaagnas nang bangkay ng singer bandang alas-10:50 ng umaga sa kaniyang inuupahang Unit 6E Lafayette 1 Eastwood City, Brgy. Bagumbayan, sa lungsod.
Bandang alas7:15 ng umaga, inireport umano ng naninirahan sa katabing unit kay Christine Lleno, property manager of La Fayette 1 na may masansang na amoy na nagmumula sa unit ng American singer sa 6th floor.
Agad namang nagpasaklolo ang property manager sa mga opisyal ng barangay at nang kanilang mabuksan ang pinto ng unit ay bumungad sa kanila ang biktima na nakahiga sa kaniyang kama at wala nang buhay.
Isasailalim pa sa awtopsiya ang bangkay ng singer upang mabatid kung ano ang ikinamatay nito.
EVELYN GARCIA