PATAY ang isang 2-anyos na batang lalaki habang sugatan naman ang kanyang ina matapos ma-hit and run ng isang trailer truck sa Navotas City kamakalawa ng gabi.
Agad binawian ng buhay sanhi ng tinamong pinsala sa ulo at katawan ang biktimang si Mark Gil Jabuena Jr, habang patuloy naman na inoobserbahan sa Tondo Medical Center ang kanyang ina na si Shirley Raagas, 32-anyos ng Blk 12 Pama Sawata, Brgy. 28, Caloocan City.
Batay sa salaysay ng saksing si Donalyn Tadeo, 36-anyos ng Blk 26 Lot 26 Ph 2, Brgy. NBBS Dagat-dagatan, Navotas City kay Cpl Florencio Nalus, habang binabagtas nito ang C3 Road patungong Agora Market sakay sa kanyang bisikleta dakong alas-7:30 ng gabi nang makita niya ang isang trailer truck na mabilis ang takbo.
Pagsapit sa C3 Bridge, Brgy., NBBS Kaunlaran, nasagi at nabangga ng naturang trailer truck ang mga biktima na patawid sa nasabing lugar na nagresulta ng agarang kamatayan ng bata.
Hindi naman huminto ang driver ng naturang truck at mabilis na tumakas patungong Road 10 sa Manila area habang isinugod naman ang ina ng bata sa nasabing pagamutan.
Nagsasagawa na nang masusing imbestigasyon ang pulisya para sa posibleng pagkakakilanlan at pagkakaaresto sa suspek. VICK TANES