ANG PINOY NGAYON... - PILIPINO Mirror

HINDI naghihirap ang Filipino. Sadya lang talagang mayroon pa rin sa ating mga kababayan ang negatibong mag-isip. Pero iilan na lamang sila, dahil sa panahon ngayon ay mas maraming Pinoy ang masisipag at nakapag-iipon, nagnenegosyo kahit pa mayroong “full-time” na trabaho at nakapag-e-enjoy dahil napangangalagaan nang mabuti ang kanilang income.

NAG-IIPON.

Marami na sigurong nakaintindi at natuto sa kuwento nina “Langgam at Tipaklong” dahil halos 50% o mahigit 33 milyong Pinoy ang mayroong ipon, ayon sa survey ng Bangko Sentral ng Pilipinas (BSP). Ang iba, bukod sa nag-iipon sa bangko, nakapag-i-invest din sa ilang financial institutions, sa stocks o kahit sa “piggy bank” na kailan lamang ay naging viral sa social media dahil sa kanilang mga pakulo kung paano makapag-ipon.

Sa panayam ng PILIPINO Mirror kay Mr. Ritchie Horario, Wealth Planner, qualifying member ng Million Dollar Round Table (MDRT) ng Pru Life UK, at isa ring professor ng state university, mahalagang nakapag-iipon o nag-iinvest para na-paghahandaan ang mga pangangailangan sa hinaharap.

“Halimbawa na lang, kung ang financial goal ay makapagtayo ng maliit na negosyo sa susunod na limang taon, ang tanong, paano mo ito matutupad? Hindi ba’t mas mabuting pag-ipunan ito at kung dumating na ang tamang panahon, mayroon kang magagamit na kapital sa iyong negosyo,” pahayag ni Mr. Horario.

Aniya pa, “hindi sapat ang pag-iipon dahil maliit lamang ang interest nito. Dapat mas mabuting i-invest ang salapi para sa mas malaking tubo o interes. Maghanap ng investment instrument na makapagbibigay ng na malaking tubo ng iyong pera.”

“Isa sa magandang investment instrument ay ang variable unit link (VUL) dahil kombinasyon ito ng investment at life insurance. Habang ang pera ay naka-invest sa bonds o equities, (depende sa iyong kagustuhan) ay may insurance benefit ka pang matatanggap sakaling magkaroon ng mga hindi inaasahang pangyayari sa buhay katulad ng aksidente, malubhang karamdaman o disability,” payo pa ni Mr. Horario.

Sinasabing ito na ang pinaka-“wais” na pamamaraan ng pag-iipon sa panahon ngayon dahil bukod sa proteksiyon sa buhay, pinoprotektahan pa nito ang iyong income o kaya sa bangko, basta ang mahalaga ay mayroon kang naiipon.

Puwede rin sa stocks mag-invest pero kailangang nakatutok ka rito dahil sa pabago-bagong lagay ng ekonomiya na mayroong epekto sa negosyo kung saan naka-invest ang iyong pera.

NAGNENEGOSYO.

Samantalahin natin ang pagkakataon habang mayroon pa tayong kinikita bilang empleyado o nagnenegosyo. Makabubuti pa rin na pagplanuhan nang maigi ang ating kinabukasan para sa mas maginhawa at maunlad na pamumuhay.

“Habang tayo ay kumikita, mas mabuting magsubi o magtabi tayo ng ilang porsiyento, i-invest natin ito upang lumago pa at mas malaking halaga ang magagamit natin sa mga pangangailangan sa hinaharap,” payo naman ni Mr. Horario sa mga working class na nag-iisip magnegosyo.

Marami na ring mapagkakakitaan sa panahon ngayon. Nariyan ang online selling (or reselling) at franchising; mayroon ding mga tinatawag na “angel financial hub” na nagbibigay pondo sa isang entrepreneur na may magandang plano sa negosyo; mayroon ding mga programa at serbisyo ang mga bangko sa micro, small, medium enterprise (MSME) katulad ng isang “May Pera sa Basurang Tagumpay” na kuwento ni Mang Junel M. Abarquez, borrower ng Robinsons Bank Microfinance Super Loan ng Bayan na naitampok sa PILIPINO Mirror noong July 10, 2018.

Mayroon ding magandang ini-o-offer sa MSME sector ang Asia United Bank na mababasa sa AskUrBanker with Kuya Mark na mababasa rin sa pahayagang ito, ang mga produkto at serbisyo ng bangko na maaari mong pag-ukulan ng pansin sa iyong pangangailangang pinansiyal.

Maaari ring magnegosyo na hindi kailangan ng malaking kapital. Marami na ang umasenso dahil sa simpleng lugawan o tapsilogan na business. Kailangan lang ang sipag at tiyaga sa ginagawa. Kahit ang talentong mayroon tayo ay puwede ring magamit para pagkakitaan. Halimbawa, kung marunong ka sa “calligraphy” o lettering, marami ang gustong kumuha sa ganitong serbisyo.

Ang talent mo naman bilang graphic artist / designer, maaari kang magkaroon ng extra income dahil may ilang mga kompanya o indibidwal na nagpapagawa ng lay-out o disenyo para sa kaniyang negosyo o produkto.

Sa madaling salita, sa panahon ngayon, tamang paggamit lamang ng oras, lakas at talento ang kailangan na may kaakibat na disiplina sa pananalapi ay tiyakin na hindi ka maghihirap.

NAG-I-ENJOY!

Ang mga naunang nabanggit ay may kinalaman sa tamang paggamit o pagkita ng salapi. Importante pa rin ang tinatawag na “work-life balance” at hindi kailangan na nakatuon lang tayo sa trabaho o negosyo.

Yes, Mag-enjoy! Nakawawala ng stress ang pagbabakasyon dahil nakapagbibigay ito ng kasiyahan sa atin lalo na kung mayroon kang nakikitang iba’t ibang lugar na gusto mong puntahan.

“Kung masaya ka, mas nagiging produktibo ka sa iyong ginagawa. Kung stressed ka sa buhay, asahan mong makaaapekto ito sa iyong trabaho o negosyo. Dapat may panahon din tayo sa ating sarili, pamilya, kaibigan at higit sa lahat, sa Panginoon na Siyang dapat nating gabay sa lahat ng ating ginagawa,” panghuling pahayag ni Mr. Horario.