ANG SUMEMPLANG NA IMAHINASYON NG IMAGINE LAW

ANG MGA patutsada ng isang law organization na nagngangalang Imagine Law  kamakailan na ang rider training at licensing ay walang kinalaman at epekto sa usapin ng road safety ay mukhang hindi tumutugma sa lohika at taliwas sa imahinasyon ng nasabing grupo.

Nakagugulat  naman talaga ang tinuran ng Imagine Law na grupo pa naman ng mga puro abogado, lalo na para sa mga proponent ng training at edukasyon sa buong mundo.

Sa isang artikulo na isinulat ni Sophia Moni­ca V. San Luis, binanggit ng Imagine Law ang isang assessment ukol sa effectiveness of interventions para sa mga nagmomotorsiklo sa isinagawang pag-aaral ng United States National Highway Traffic and Safety Administration  na nagsabing ang motro-cycle licensing at motorcycle rider training ay mababa ang impact o epekto sa road safety.

Inamin naman ng mismong pag-aaral ng Estados Unidos na limitado ang datos upang makapabigay ng hindi mapasusubaliang  konklusyon ukol sa pagiging epektibo ng interventions katulad nga ng licensing at training.

Kung gayon, at mismong ang pag-aaral na pinagbasehan  ng Ima­gine Law na uma­aming hindi ito conclusive dahil sa kakulangan ng datos, ay pipiliting ga­miting  basehan pa rin  naman ng opinyon ng nasabing organisasyon ng mga abogado, ay medyo mapapangiwi ka namang talaga dahil taliwas at lihis.

Hindi ba lumalabas na pang-aabuso ito sa isang pag-aaral para lamang sa itinutulak na interes ng mga taong nasa likod nito?

Isa pang punto, ang pag-aaral ay ginawa sa Estados Unidos na malaki ang kaibahan sa kultura at gawi ng Filipinas. Sa US kasi ang motorsiklo ay karaniwang tinitingnan bilang recreational vehicle, hindi katulad sa Filipinas na ang karaniwang gamit sa motor ay isang commuter vehicle. Diyan pa lamang sa katotohanang ‘yan ay hindi na magi­ging applicable sa Fi­lipinas ang nasabing pag-aaral.

Kaya lalo akong namangha na ang isang grupo ng mga abogado  na inaakala nating pagkakatalino ay mahulog sa patibong ng katangahan o pagtatanga-tangahan sa paggamit sa isang pag-aaral na bukod sa kulang sa datos ay hindi rin aakma sa Filipinas.