ANGKAS PILOT RUN APRUB SA KONGRESO, DOTr

NAGKASUNDO ang Mababang Kapulu­ngan ng Kongreso at ang Department of Transportation ( DOTr) sa panukalang pilot run ng motorcycle ride-hailing service na Angkas bilang isang test case para sa pagbabalangkas ng angkop na regu-lasyon para sa motorcycle taxis.

Inihayag ni DOTr Assistant Secretary Mark de Leon na dalawang beses nang nagpulong ang Technical Working Group (TWG) na binuo ng ahensiya upang pag-aralan ang mga naaangkop na regulasyon para sa motorcycle taxis bilang public utility vehicles. Kasalukuyan din silang nagbabalangkas ng implementing rules and regulations (IRR) para sa napipintong pilot run ng Angkas.

“Dalawang beses nang nagpulong ang TWG at sa ikatlong pulong ay isasapinal na namin ang IRR at ang proposal para sa pilot run ng Angkas,” ani De Leon.  Sa oras na ito ay maging pinal, ang IRR ay isusumite kay DOTr Secretary Arthur Tugade para sa kanyang pag-apruba.

Sa nasabing pagdinig kahapon, sinabi ni Manila Rep. Cristal Bagatsing na walang humpay sa pagtatanong sa kanya ang kanyang mga ­constituent sa iba’t ibang barangay sa Maynila kung kailan babalik ang Angkas.

“Lagi akong tinatanong ng aking mga kababayan sa Maynila kung kailan ba magiging legal ang Angkas dahil iyon lang ang ka-nilang hanapbuhay,” ani Bagatsing. “Ano ba ang kaila­ngan naming gawin para mapabilis ang lahat?” dagdag niya.

Binigyang-diin din ni House Committee on Metro Manila Development chairman Rep. Winston Castelo na ang provisional au-thority para sa pagpapanumbalik ng operasyon ng Angkas ay lubhang kaila­ngan ng libo-libong mananakay na araw-araw na na-hihirapan sa kanilang pagko-commute. Malaking tulong din ito, aniya, upang muling magkaroon ng hanapbuhay ang may 27,000 Angkas-biker partners na nawalan ng kita simula nang magbaba ang Korte Suprema ng TRO noong Disyembre.

“Bagamat marami ng panukalang batas ang naisumite, kailangan pa rin nating bigyan ang Angkas ng provisional authority na muling makapag-operate para sa kapakanan ng mga Filipinong commuters,” ani Castelo.

Nagpahayag naman ng pasasalamat sa DOTr si Angkas Head of Regulatory and Public Affairs George Royeca sa mga naganap na pagpupulong ng TWG.

“Malaking tulong ang ibi­nibigay ng DOTr sa pagbuo ng isang regulatory framework para sa motorcycle taxis,” dagdag pa ni Royeca.

Mahigpit ding isinusulong ni Congressman Arnolfo Teves, Jr., ng ikatlong distrito ng ­Negros Oriental, Rep. Arnolfo Teves Jr. ang muling pag-arangkada ng Angkas.

“Mabuti na magawa nga­yon ang pilot run upang ngayon pa lang ay makita na natin ang resulta ng operasyon at ng binabalangkas na mga regulasyon. Kung mayroon na kayong IRR, para na rin ‘yang aprubado sa inyong panig,” ani Teves sa DOTr.

Nauna rito, nagpalabas ng pahayag si Makati City Rep. Luis Campos, Jr. na nagsasabing ang legalisasyon ng motorcycle taxis ay magtutuldok sa talamak na extortion ng mga tiwaling ahente ng batas.

“Right now, motorcycle taxi drivers are vulnerable to a shakedown wherever they go,” ani Campos.

Si Campos ang may akda ng House Bill 8855, o ang panukalang Act Allowing Motorcycles as PUVs.