(Apela sa BSP)2% INTEREST RATE SA CREDIT CARD PANATILIHIN

INIHAIN ni Makati City 2nd Dist. Rep. Luis Campos Jr. ang House Resolution No. 459 na nananawagan sa Bangko Sentral ng Pilipinas (BSP) na panatilihin ang kasalukuyang 2% maximum monthly interest rate sa unpaid o outstanding credit card balances.

Paggigiit ng kongresista, ang hakbang na ito ay makatutulong sa Filipino consumers na makaagapay sa epektong dala ng naitalang four-year high 6.9 percent inflation rate noong Setyembre.

“We want the BSP to keep credit card pricing reasonable and within reach of consumers that are now reeling from the soaring cost of goods and services,” sabi pa ng Makati City lawmaker.

“Salaried Filipinos are struggling to make ends meet. They are increasingly relying on their credit cards to make essential purchases and to pay bills, including the tuition fees of their children,” pagbibigay-diin pa niya.

Nakapaloob din sa nasabing resolusyon ang panawagan sa BSP na pagpapanatili sa maximum 1 percent monthly add-on rate sa credit card installment loans at ang P200 per transaction ceiling sa cash advance processing fees.

Nabatid na sa susunod na buwan ay nakatakdang magsagawa ng kaukulang pag-aaral ang BSP hinggil sa nabanggit na thresholds charges, na sa tatlong nakaraang semi-annual reviews ng banking regulator ay napagpasyahan nitong hindi baguhin ang itinakdang caps o limits.

“The lifting of the ceilings would only aggravate the financial burden of consumers,” ani Campos.

Base sa datos ng BSP, mahigit sa 10.3 million Filipinos ang may credit cards, habang ang banking system’s credit card receivables sa bansa ay umaabot sa kabuuang P478.4 billion noong Hunyo 30, 2022.

ROMER R. BUTUYAN