(Apela sa economic managers) IMPORTED NA BABOY ISUBASTA

HINIMOK ni Senadora Imee Marcos ang mga economic manager ng bansa na isubasta ang mga imported na baboy para makatiyak na lantad ang alokasyon sa mga negosyante sa oras na madesisyunan na ang pinal na dami ng minimum access volume (MAV) ng aangkating baboy.

Sinabi ni Marcos, chairman ng Senate committee on economic affairs, na makatutulong ang subasta sa imported na baboy para matanggal ang suspetsa na ang nakatakdang pagtaas ng MAV ay pabor sa mga negosyanteng gustong mag-samantala sa kapos na supply ng baboy sa mga palengke habang patuloy namang nagpapahirap sa local hog raisers ang African swine fever (ASF).

“Dagdag bantay ang pagsubasta sa mga imported na baboy na makasisira ng loob sa mga gustong magsamantala. Madadagdagan pa ang pondo ng gobyerno mula sa pag-isyu ng mga import permit,” giit ni Marcos.

Nagdesisyon na rin naman ang ehekutibo at lehislatibong sangay ng gobyerno na magkaroon ng kompromiso sa lebel ng MAV at taripa ng imported pork, pero inaasahang magiging matindi ang negosasyon matapos ang pagdinig ng Senate Committee of the Whole nitong nakaraang linggo.

“Ang totoo, nasa masaklap na sitwasyon tayo. Gabayan sana kami ng Espiritu Santo na makahanap ng mainam na solusyon!” ani Marcos, na naninindigang ang sobra-sobrang pag-aangkat ng karneng baboy ang unang kikitil sa mga lokal na magbababoy bago pa maresolba ang  krisis sa ASF.

Tinukoy ni Marcos ang ‘malaking pagkakaiba’ sa kalkulasyon ng mga mambabatas at mga ahensiya  ng gobyerno, habang isinusulong naman ng senadora na taasan lamang ang MAV mula sa ika-apat na buwan matapos bawasan ang taripa na hindi dapat bababa sa 10% at 20% para sa mga inangkat sa loob at labas ng MAV.

Dagdag ni Marcos, hanggang 150,000 MT lang ang dapat na idagdag sa MAV sa ika-apat hanggang ika-12 buwan, pagkatapos ay hanggang 204,000 MT lang na maximum ang dapat maabot pagkatapos ng isang taon. VICKY CERVALES

Related posts:

(Nalugi dahil sa pagbaha ng imported pork products) 30% NG BACKYARD HOG RAISERS TIGIL OPS NA SRP SA PORK NAMUMURONG TUMAAS DAHIL SA PAGMAHAL NG PRODUCTION COST SRP SA PORK TUMAAS DAHIL SA KAKULANGAN NG SUPLAY – DA (‘Go signal’ na lamang ni Duterte ang hinihintay) DAGDAG NA PORK IMPORTS (Bubusisiin ng DA) PAGLIHIS NG PORK SUPPLY SA METRO (Dahil sa ASF) P100-B KITA SA PORK NAWALA (Pinaiimbestigahan ng DA) ‘TONGPATS’ SA PORK IMPORTS (Para mapatatag ang presyo sa merkado) GOBYERNO MAG-IMPORT NG PORK