(Aprub na sa House panels) BAYANIHAN 3 SUBSTITUTE BILL

IAAKYAT na sa plenaryo ang pagtalakay sa P405.6-billion na Bayanihan 3 bill.

Ito ay makaraang pormal na aprubahan sa joint hearing ng House Committees on Economic Affairs at Social Services ang substitute bill at committee report ng Bayanihan 3.

Ang Bayanihan 3 bill ay magsisilbing ‘lifeline measure’ para maayudahan ang mga mahihirap na pamilya at mga industriyang apektado ng COVID-19 pandemic.

Tanging inamyendahan muna sa panukala ang pondo na posibleng paghugutan para sa Bayanihan 3.

Batid ni Economic Affairs Chair Sharon Garin na hindi dapat galawin ang ‘for later release’ na budget sa ilalim ng 2021 national budget na malinaw na nakasaad sa panukala.

Hahatiin sa tatlong phase ang budget ng Bayanihan 3 kung saan ang phase 1 pa lamang muna ang mapopondohan na maglalaman ng P167 billion.

Ang pondo para sa Phases 2 at 3 ay mananatili naman bilang standby funds, na dedepende pa sa certificate of availability of funds na ibibigay ng Bureau of the Treasury.

Nakapaloob sa Bayanihan 3 ang “Ayuda to all Filipinos” o ang P1,000 na ayuda na ipagkakaloob sa lahat ng 108 million na mga Filipino na ibibigay ng dalawang beses na may pondong P216 billion.

Samantala, dumalo rin si Speaker Lord Allan Velasco, principal author ng Bayanihan 3, sa pagdinig at umapela sa Senado na suportahan ang Kamara sa agarang pagpapatibay ng nasabing ‘lifeline measure’.

Aabot sa 290 kongresista ang nagpalista para maging principal author at co-authors ng Bayanihan 3 bill. CONDE BATAC

Related posts:

(Inihain sa Kamara P420-B) BAYANIHAN 3 P1K FOR ALL SA BAYANIHAN 3 ISINUSULONG SA KAMARA (Inihirit kay Duterte) SPECIAL SESSION SA BAYANIHAN 3 P420-B BAYANIHAN 3 HINAHANAPAN NA NG PONDO (Iminungkahi sa Kamara) GOCC DIVIDENDS GAMITIN SA BAYANIHAN 3 (Tiniyak ng Kamara) PAG-APRUBA SA P405.6-B BAYANIHAN 3 (Sa ilalim ng Bayanihan 3) P2K AYUDA SA BAWAT FILIPINO (Sa ilalim ng Bayanihan 3) P5K-P10K AYUDA SA HOUSEHOLDS